BAT EGIN EGUNA
Bat Egin Eguna, eskubide zibil eta politikoen aldeko jaia, 26an izango da
Datorren 26an, Altsasu-Urdiaingo hariztian, ospatuko da Bat Egin Eguna, eskubide zibil eta politikoen aldeko jaia.
01/09/2010 15:11:00
BILBO-. Beren jarduera politiko eta instituzionalagatik hainbat sumarioetan auziperatuta dauden herritarrek hilaren 26rako Bat Egin Eguna iragarri dute gaur "eskubidezale guztiek euren agendan ondo azpimarra dezaten".
Eskubide zibil eta politikoekin Bat Egin Eguna iritsi arte, hainbat mobilizazio izan direla azaldu dute auzi horiek salatu, eskubide zibil eta politikoak aldarrikatu eta auzipetuei elkartasuna adierazteko. "Prozesu hauetan auzipetuta gaudenol dei egiten dizuegu mobilizazio horietan parte hartzeko", esan dute Bilbon emaniko prentsaurrekoan.
Honela, deialdi berezia luzatu dute Adierazi EH ekimenak hilaren 11rako Bilbon deitu duen manifestazioan parte hartzeko.
Udalbiltza eta ekimen ezberdinetako auzipetuek beraien kontra zabaldutako prozesuen "bidegabekeria" salatu dute berriro. Adierazi dutenez, oinarrizko eskubideak gauzatzea, babestea edo sustatzea da leporatzen dietena.
